Шаварт унасан шарын эзний үг

Миний шар шаварт уначихаад хөглөж байнаа. Яаж шавраас нь татаж гаргах вэ гээд өдрийн бодол шөнийн зүүд болж хэсэг явлаа. Уг нь сонирхолтой гэдэг ч юм уу эсвэл зугаатай (for fun) , бүр цаашлаад бас дэлхийн хамгийн "амархан" хэл гэгддэг Англи хэлийг мэддэг, сонирхдог, судалдаг , ярьдаг, сонсдог бүх хүмүүсийг ур чадвараа сонжооч ээ (challenging) гэж уриалсан ухаантай юм.

Манай группэд гишүүнээр элссэн эрхэм хүндэт ХЭН (Халуун Элгэн Нутагтан) та бүхний дотор энэ байтугайг хөрвүүлээд хаячих чадалтай хүмүүс зөндөө бий гэдэгт итгэлтэй байгаа. Гэхдээ анх энэ уралдааныг зарласанаас хойш өнөөдрийг хүртэл нэг ч орчуулга тавигдаагүй байхыг бодоход заримд нь дэндүү амархан санагдаад, зарим нь зав зай муутай болоод , эсвэл зарим нэг нь өөрийгөө "голоод" жаахан зүрхлэж чадахгүй ч юм уу , эсвэл нэрэлхээд, бас "ичингүйрээд" ч юм уу, үгүй бол даруу зан гаргаад нэг их хүчлээгүй байж мэдэх юм.

Тэгэхээр шаварт унасан шарын эзэн миний бие салхийг хагалж анхны шан татахаар шийдлээ. Араас минь тэгээд манай ХЭН-үүд уухайлаад шуурчих байхаа гэж найдна.
Сонгон шалгаруулалтын тухайд би ч ганцаараа шийдэхгүй. Бүх ирсэн орчуулга дээр гишүүдийн дунд санал хураалт явуулж, олонхийн санал авсан нь түрүүлэхээр хийвэл шударга болно гэж бодож байгаа. Гэхдээ гишүүд санаа оноогоо нэмэрлэнэ биз дээ.

Дууныхаа орчуулгыг www.haluunelgennutag.blogspot блог дээр Page elements рүү ороод Gadget хэлбэрээр тавих юм шүү. Орчуулга тань бэлэн болохоор email хаягаа бичсэн хүсэлт явуулбал блог дээр нийтлэх зохих эрхийг олгосон урилга явуулах юм. Эсвэл группын сайт дээр ( http://www.facebook.com/home.php?#/group.php?gid=90203738704 ) Comment хэлбэрээр, мөн Discussion board руу ороод тэнд үлдээж болох юм. Тэгвэл би блог дээр copy & paste хийгээд тавьж болно. Орчуулгын эзэн гэдэгээ тодорхойлсон нэр ус тавихаа мартав.

За ингээд юу ч гэсэн өөрийнхөө хувилбарыг блог дээр тавилаа. Угаасаа Англи хэл гэдгийг өтөлсөн хойноо оролдсон болохоор жаахан тааруу; тийм болохоор миний орчуулга ч хүнд үзүүлэхэд ичмээр дамшиг болсон байх. Гэхдээ ийм юман дээр болж өгвөл ичихгүй амьдарвал тустай болов уу гэж мунхаглана.